ملل متحد از ادامه‌ی کمک‌هایش به افغانستان اطمینان داد

اندریکا راتوت، معاون نماینده‌ی ویژه‌ی سازمان ملل متحد برای افغانستان، گفته است که کمک‌های انسان‌دوستانه‌ی جامعه‌ی جهانی به شهروندان افغانستان ادامه می‌یابد.

ارگ، بامداد امروز (سه‌شنبه، ۱۴ حمل) در خبرنامه‌ای در حساب کاربری اکس خود نوشته که اندریکا راتوت، این موضوع را در دیدار با عبدالسلام حنفی، معاون اداری ریاست‌الوزرای امارت اسلامی، مطرح کرده و از امارت اسلامی خواسته است که در رساندن کمک‌های انسان‌دوستانه به شهروندان مستحق افغانستان، هم‌کاری کند.

ارگ، به نقل از اندریکا راتوت، نوشته که اخراج اجباری مهاجران افغان از کشورهای همسایه خلاف قوانین بین‌المللی مهاجرت است.

در خبرنامه آمده که عبدالسلام حنفی، در این دیدار از هم‌کاری امارت اسلامی با سازمان‌ها و نهادهای بین‌المللی برای رساندن کمک‌های انسان‌دوستانه به نیازمندان، اطمینان داده است.